Ro Bueoligan it Logo

 

Bueoligan – Sa experyensya it Parokya ni San Rafael, nagatimaan ra ku programa ag sistema it “Balik-Haead” ag “Tithing” nga suno man sa dekreto kung Ikaywang Plenaryo Konseho it Pilipinas (PCP II Art 118-119) ag kung Nahaunang Synodo ku Dioseses it Kalibo, (Decrees on Temporalities No. 17-18) eamang nga rong mga tumueo hay makiparte sa misyon bilang parianong mga tawo (Temporalities No. 9) agud sa rato makapatigayon kita sa paghimaya sa Dios, sa pagbantala ku mayad nga balita, sa pag-ulikid sa pinakakubos katon ag sa pagsuporta sa kinahang-eanon kung aton nga mga kaparian ag Obispo (Mt. 10:7-11; Can. 281;1274 as cited under Temporalities No. 10).  Ruyon ro gusto ipaabot nga paghangop ku kabilugan ku logo.

10 nga katawo – baye, eaki, unga, magueang, may asawa ag owa, madre, pari – nagsimbolo ku Katilingban Kristiana riya sa Parokya halin sa napueong ka kabarangayan it Balete

Nagapas-an ku Simbahan nga nagapamanawon - isaeang ka paghimakas ku Katilingban it Dios eamang madangat rong kahimtangan it “Bag-ong Eangit, Bag-ong Eugta” (Isaiah 65:17 & 66:22; 2 Pet. 3:13; & Revelation 21:1); Pag-aeaengay ag paghueueogan it abaga ag rong pagpas-an ku “Krus it Pag-eigmanghuran” kay Kristo Hesus.

Si San Rafael nga Arkangel – ro manugbueong it Dios, ro ginpadaea it Dios sa pag-iba sa aton nga pagpamanawon ag paghimakas ag makabueong sa aton nga pagkabulag sa kamatuoran; ro Patron ku Katilingban it Dios sa atong Parokya.

Berde  – Kolor ku Espiritu Santo, ku kabuhi, ku sa gihapon ag ku pag-eaum. Kolor nga makita naton sa simbahan sa tiempo ordinaryo sa aton nga pagpamanawon sa adlaw adlaw nga paghimakas, nga nagatimaan ma ku aton nga pag-uli sa baeay ku aton nga Amay sa mga Eangit.

Puea – timaan ku aton nga hamdum nga madangat ag mabaeay rong “Bag-ong Eangit, Bag-ong Eugta”; rong kaeayo o baga (nga angay kabkaban, suma ay nagakaugdaw eon) sa aton nga dughan; ro Paghigugma it Dios; ro Kasakit ag Kamatayon ni Hesus; ag rong kaisog naton sa pagpas-an ku Krus it Pag-eigmanghuran kay Kristo Hesus.

Bueawan  o Puti (The backdrop of the Logo) – Pagkaputli ag pagkasantos; Si Maria nga owa it dagta nga saea; ro pagkabanhaw it katilingban pareho nga nabanhaw si Hesus.